छत्रपती संभाजीनगर (सीएससीएन वृत्तसेवा) : मार्केटिंगसाठी नेमलेल्या कामगाराने मालकाशीच गद्दारी केली. ही बाब कळल्यानंतर मालकाने त्याला कामावरून काढले. त्याचा राग येऊन या बहाद्दर कामगाराने साथीदारांसोबत मिळून मालकावरच जीवघेणा हल्ला चढवला. बेदम मारहाण केली. यात मालक गंभीर जखमी झाला आहे. ही घटना रविवारी (३० जून) बजाजनगरात घडली.
नागेश्वर रमेशराव मुळे (रा. सिडको वाळूज महानगर) यांची सोनखेडा (ता. खुलताबाद) येथे लक्ष्मी मिल्क नावाची कंपनी आहे. त्यांनी दूध विक्री व मार्केटिंगच्या कामासाठी ४२ जणांना कामावर ठेवलेले आहे. महिनाभरापूर्वी राहुल पवार या तरुणालाही मार्केटिंगसाठी नेमले होते. राहुलने जालन्याचे वितरक तुषार भुरेवाल यांना तुम्ही कंपनीचा माल खरेदी करा व त्याचे पैसे देऊ नका, असे फोन करून सांगितले होते. भुरेवाल यांनी राहुलसोबत झालेल्या संभाषणाची रेकॉर्डिंग मुळे यांना पाठवली. आपलेच मीठ खाऊन कंपनीचे नुकसान करत असल्याने मुळे यांनी १९ जूनला राहुलला जाब विचारून कामावरून काढून टाकले. त्यामुळे विकृत राहुलने मुळे यांना धडा शिकविण्याचा कट आखला.
आधी कार्यालयाबाहेर बोलावून घेतले…
रविवारी दुपारी मुळे हे बजाजनगरातील कार्यालयात असताना त्यांना शंकर पवार या व्यक्तीने फोन करून कार्यालयाबाहेर बोलावून घेतले. काही वेळातच राहुल दुचाकीवरून चार साथीदारांना घेऊन तेथे आला. शंकर पवार, राहुल पवार व त्यांच्यासोबत असलेल्या चार अनोळखी व्यक्तींनी लाथा- बुक्क्यांनी व लाकडी दांड्याने मुळे यांना मारहाण केली. मुळे यांच्या ओरडण्याच्या आवाजाने कार्यालयातील कामगार बाहेर आले. त्यांनी मुळे यांची सुटका केली. मुळे यांच्या हाताचे मनगट फॅक्चर झाले असून, ते गंभीर जखमी झाले आहेत.
घटना सीसीटीव्हीत कैद…
मारहाणीत मुळेंचा मोबाइलही हल्लेखोराने हिसकावून १० हजार रुपयांची मागणी केली. मुळे यांनी १० हजार रुपये दिल्यावरच हल्लेखोरांनी मोबाइल परत दिला. त्यानंतर ते पसार झाले. मारहाणीची घटना सीसीटीव्ही कॅमेऱ्यात कैद झाली आहे. भरदुपारी झालेल्या या मारहाणीच्या घटनेने वाळूज एमआयडीसीत खळबळ उडाली आहे. नागेश्वर मुळे यांच्या फिर्यादीवरून वाळूज एमआयडीसी पोलिसांनी शंकर पवार, राहुल पवार व त्यांच्या चार साथीदारांविरुद्ध गुन्हा दाखल केला आहे. अधिक तपास पोलीस निरीक्षक कृष्णा शिंदे यांच्या मार्गदर्शनाखाली पोलीस उपनिरीक्षक अशोक इंगोले करत आहेत.
.jpg)
.jpg)
.jpg)
