जेलमधून बाहेर बाहेर पडताच कुख्यात गुन्हेगार टिप्‍याची निघाली जंगी मिरवणूक, विजयनगरात झाला जल्लोष!, पोलिसांना पुन्हा चॅलेंज

छत्रपती संभाजीनगर (सीएससीएन वृत्तसेवा) : वर्षभर कारागृहात स्थानबद्ध राहिल्यानंतर बाहेर पडताच कुख्यात गुंड शेख जावेद ऊर्फ टिप्या शेख मकसूद (२९, रा. विजयनगर) याची त्‍याच्‍या टवाळखोर मित्रांनी कारागृहापासून विजयनगरपर्यंत कारमधून जंगी मिरवणूक काढली. मिरवणूक विजयनगरात आल्यावर आतषबाजी केली. हा धक्‍कादायक प्रकार समोर आल्यानंतर पुंडलिकनगर पोलिसांनी टिप्‍याविरुद्ध गुन्हा दाखल केला आहे.

टिप्याविरुद्ध २० हून अधिक गुन्हे दाखल आहेत. हत्या, हत्येचे प्रयत्न, लुटमार, खंडणी, दंगल, विनयभंग, पोलिसांवर हल्ला असे गुन्हे त्‍याने केले आहेत. त्‍याचे गुन्हे कमी होत नसल्याने पोलिसांनी २३ ऑक्टोबर २०२३ रोजी त्‍याची रवानगी हर्सूल कारागृहात करत वर्षभरासाठी स्थानबद्ध केले होते. दोन दिवसांपूर्वी त्याची सुटका झाली. बाहेर येताच त्‍याने मिरवणूक आणि जल्लोष करून पोलिसांना एकप्रकारे आव्हानच दिले.

अशी आहे टिप्याची हिस्‍ट्री…
वाढत्‍या गुन्ह्यांमुळे पोलिसांच्या हिटलिस्टवर येताच फेब्रुवारी २०२२ मध्ये टिप्या न्यायालयात हजर झाला होता. त्यावेळी त्‍याला एक वर्षासाठी स्थानबद्ध करण्यात आले होते. फेब्रुवारी २०२३ मध्ये तो जेलबाहेर आला. त्‍यानंतर त्याची गुन्ह्यांची मालिका पुन्हा सुरू झाली. त्‍याला व त्याच्या टोळीला काही अवैध व्यावसायिकांनी पोसले. वाढत्‍या गुन्ह्यांमुळे पुन्हा तो पोलिसांच्या रडारवर आला. पोलीस आपला सोक्षमोक्ष लावतील या भीतीने तो ७ ऑक्टोबर २०२३ ला पुन्हा न्यायालयात हजर झाला. २३ ऑक्टोबर २०२३ पासून तो हर्सूल कारागृहात वर्षभरासाठी स्थानबद्ध होता.