जुन्या मोंढ्यातील तक्षशिलानगरमध्ये गोळीबार!

छत्रपती संभाजीनगर (सीएससीएन वृत्तसेवा) : जुन्या मोंढ्यातील तक्षशिलानगरमध्ये शनिवारी (२४ ऑगस्ट) रात्री ९:३० वाजता गोळीबार झाल्याच्या प्रकाराचे खळबळ उडाली आहे. सुसाट तीन दुचाकींवरून ५ ते ६ तरुण शिवीगाळ, आरडाओरड करत होते. त्‍यांना स्थानिक तरुणांनी आरडाओरड न करण्यास सांगितले असता त्यातील एकाने कंबरेला लावलेली पिस्तूल काढून गोळीबार केला. दोन ते तीन फायरिंग होऊन भिंतीला छिद्र पडले. त्यातील एक काडतूस पोलिसांना मिळाले. घटनेत सुदैवाने कोणीही जखमी झाले नाही.

नक्की काय झाले?
तक्षशिलानगरच्या प्रवेशद्वारापासून काही अंतरावर पायऱ्यांवर काही स्थानिक तरुण रात्री नऊला गप्पा मारत होते. मोंढा नाक्याकडून सुसाट वेगात तीन दुचाकींवर ५ ते ६ तरुण शिवीगाळ, आरडाओरड करत आले. तिथून महिला शतपावली करत असल्याने स्थानिक तरुणांनी त्यांना आरडाओरड, शिवीगाळ करू नका, असे बजावले. त्यामुळे ते संतापले. त्यांनी दुचाकी गाड्या थांबवून शिवीगाळ सुरू केली. त्‍यातील एकाने कंबरेला लावलेली पिस्तूल काढल्यावर एकच पळापळ सुरू झाली. त्याने गोळीबार सुरू केला. दोन-तीन फायरिंग केल्याचे आवाज झाले.

जिन्सी पोलिसांना कळताच पोलीस निरीक्षक रामेश्वर गाडे, सहायक पोलीस निरीक्षक गौतम वावळे यांनी सहकाऱ्यांसह घटनास्थळी धाव घेतली. तोपर्यंत तरुणांनी त्‍या गुंडांना पकडण्याचा प्रयत्न केला असता त्यांची एक दुचाकी (एम एच २१ सीसी ३६७६) घसरून पडली. स्थानिक तरुणांची संख्या बघता त्‍यांनी पळ काढला. पोलिसांनी दुचाकी जप्त केली. गोळीबार करणाऱ्यांच्या कपड्याला रक्‍त लागलेले होते. त्यामुळे ते कुठूनतरी राडा करून आल्याचे दिसत होते. त्यातील दोन तरुण राजा बाजार, कुवारफल्ली परिसरातील कपडे व्यावसायिक असल्याचे स्थानिक तरुणांनी पोलिसांना सांगितले. एक काडतूस पोलिसांना घटनास्‍थळी मिळाले आहे.