जलसंधारण विभागाच्या कार्यकारी अभियंत्‍याची पत्रकाराला मारहाण, जीवे मारण्याची धमकी, छत्रपती संभाजीनगरातील प्रकार, वेदांतनगर पोलीस ठाण्यात गुन्हा दाखल

छत्रपती संभाजीनगर (सीएससीएन वृत्तसेवा) : मृद व जलसंधारण विभागाच्या प्रभारी कार्यकारी अभियंत्‍याने विरोधात आलेल्या बातमीबद्दल साप्‍ताहिकाच्या संपादकाला अश्लील शिवीगाळ करून मारहाण केली व जीवे मारण्याची धमकी दिल्याचा धक्कादायक प्रकार समोर आला आहे. या प्रकरणी उन्‍नती साप्‍ताहिकाचे संपादक बाजीराव भानुदास सोनवणे (वय ५१, रा. गजानननगर, गारखेडा परिसर) यांच्या तक्रारीवरून वेदांतनगर पोलिसांनी प्रभारी कार्यकारी अभियंता सुंदर वाघमारे यांच्याविरुद्ध आज, २१ डिसेंबरला गुन्हा दाखल केला आहे.

बाजीराव सोनवणे हे आई, पत्नी, ३ मुलांसह राहतात. त्यांचे उन्नती साप्ताहिक वर्तमानपत्र आहे. त्यांनी त्यांच्या साप्ताहिकात ‘अभियंता वाघमारे नावाने सुंदर मात्र भ्रष्टाचाराने झाले विकृत, राजकारणाच्या जोरावर हात पाय तोडण्याची भाषा’ या मथळ्याखाली बातमी छापली होती. छापलेली बातमी ही वस्तुस्थिती दाखविणारी होती. छापलेल्या साप्ताहिकाच्या प्रती विविध वरिष्ठ कार्यालयांत वाचकांसाठी मोफत टेबलवर जाऊन करण्यात येत असताना मंगळवारी (१७ डिसेंबर) अधीक्षक अभियंता मृद व जलसंधारण विभाग यांच्या कार्यालयात साप्ताहिकाचे अंक देण्यासाठी सोनवणे स्वतः गेले होते.

अधीक्षक अभियंता अजित परांडे यांची भेट घेऊन त्यांनी बातमीचा पाठपुरावा घेतला आणि कार्यालयाबाहेर आले. त्यावेळी प्रभारी कार्यकारी अभियंता सुंदर वाघमारे हे त्यांच्या गाडीतून उतरून सोनवणे यांच्याजवळ आले. “तू माझ्याविरुध्द बातम्या छापतोस का? तू तुझे साप्ताहिक या कार्यालयात कसे वाटप केले, माझ्याविरुध्द बातमी छापून माझ्या वरिष्ठ कार्यालयात पेपर वाटतोस का? तुझे हात-पाय तोडतो, डोळे फोडून टाकतो, अशी धमकी देऊन अश्लील व अर्वाच्य भाषेत शिवीगाळ सुरू केली.

त्‍यांच्या शिवीगाळ व धमक्यांचे सोनवणे यांनी मोबाइलमध्ये रेकॉर्डिंग सुरू केले असता कार्यकारी अभियंता सुंदर वाघमारे यांनी, तू मोबाईल बंद कर, रेकॉर्डिंग करू नकोस असे म्हणत सोनवणे यांच्या हातातील मोबाइल हिकासवून घेत फेकून दिला व सोनवणे यांना हाताने मारहाण सुरू केली. “तू यानंतर बातमी छापली तर पेपर वाटायला तू राहणार नाही’, असे धमकावले. तुझ्याविरुध्द खंडणीचा गुन्हा दाखल करतो, अशी धमकी दिली. त्‍यानंतर सोनवणे यांनी वेदांतनगर पोलीस ठाण्यात धाव घेऊन प्रभारी कार्यकारी अभियंता सुंदर वाघमारे यांच्याविरुद्ध तक्रार दिली. पोलिसांनी वाघमारे यांच्याविरुद्ध गुन्हा दाखल केला आहे. अधिक तपास सहायक पोलीस आयुक्‍त संपत शिंदे करत आहेत.