छ. संभाजीनगरात वासनांधांचा कहर सुरूच…!; ना शाळकरी मुलगी सुरक्षित, ना ६७ वर्षांची वृद्धा… सामान्यांचे आता डोके काम करेनासे झालेय..!!

छत्रपती संभाजीनगर (सीएससीएन वृत्तसेवा) : छत्रपती संभाजीनगरात वासनांधांनी कहर केला आहे. रोज विनयभंगाच्या दोनतीन घटना समोर येत आहे. कधी रिक्षावाला, कधी बसमध्ये टवाळखोर, तर कधी रोडरोमिओ…यांच्यापासून ना शाळकरी मुलगी सुरक्षित आहे, ना ६७ वर्षांची वृद्धा…आता आणखी ४ घटना समोर आल्या आहेत.

-पैठण रोडवरील एका शाळेत अल्पवयीन विद्यार्थिनी शाळेच्या गेटमधून आत प्रवेश करतानाच नितीन बाबूराव अंभोरे (वय ३५, रा. जिंतूर, जि. परभणी) याने हात धरून छेड काढली. मुलीने सातारा पोलीस ठाण्यात तक्रार दिली असून, त्‍यावरून नितीनविरुद्ध गुन्हा दाखल केला आहे.
-कामाहून घरी परतणाऱ्या महिलेला वाटेत अडवून गणेश अशोक सुखदान (वय २९, रा. पंढरपूर) याने तिच्याशी अश्लील वर्तन केले. ही घटना पंढरपूर परिसरात घडली. महिलेच्या तक्रारीवरून वाळूज एमआयडीसी पोलिसांनी गणेशविरुद्ध गुन्हा दाखल केला आहे. काही दिवसांपूर्वी महिला कामावरून घरी येत होती. गणेशने तिला रस्त्यात अडवून अश्लील चाळे केले. तू कोणाला काही सांगितले तर तुझ्या पती व मुलांना ठार मारून टाकेल, अशी धमकीही दिली. महिलेने बदनामी होईल गप्प बसली. त्यानंतर पुन्हा आता रात्री ११.३० वाजता गणेशने तिचे घर गाठून दरवाजा उघडण्यासाठी धमकावले. पतीने चौकशी केली असता यापूर्वीही गणेशने रस्त्यात अडवून छेड काढल्याची माहिती महिलेने दिली.

-बजाजनगरात राहणाऱ्या मुलीला भेटण्यासाठी पुणे येथून आलेली ६७ वर्षीय महिला, तिचा ७५ वर्षीय पती पंढरपुरातील तिरंगा चौकात उतरले. रिक्षाची वाट पाहत असताना अमोल कैलास कडू (वय २९, रा. पवननगर, रांजणगाव शेणपुंजी) हा तिथे आला. जरा बाजूला चला असे म्हणून त्याने वृद्धेचा हात पकडत अश्लील वर्तन केले. नागरिकांनी त्याला पकडून चोप देत पोलिसांच्या ताब्यात दिले. अमोलविरुद्ध वाळूज एमआयडीसी पोलिसांनी विनयभंगाचा गुन्हा दाखल केला आहे.
-सातारा गावातील एका महिलेच्या घरात घुसून तरुणाने छेड काढली. आकाश पवार याच्याविरुद्ध महिलेच्या तक्रारीवरून सातारा पोलिसांनी गुन्हा दाखल केला आहे.