छ. संभाजीनगरचे ASPI द्वारकादास भांगे यांना राष्ट्रपतींचे पोलिस पदक जाहीर

छत्रपती संभाजीनगर (सीएससीएन वृत्तसेवा) : शहर पोलीस दलातील सहायक पोलीस उपनिरीक्षक द्वारकादास भांगे यांना आज, १४ ऑगस्टला राष्ट्रपतींचे पोलिस पदक जाहीर झाले आहे. याबद्दल पोलीस आयुक्त प्रवीण पवार यांनी त्‍यांचे स्वागत केले.

द्वारकादास भांगे पोलिस दलात १९९१ मध्ये दाखल झाले. त्यांनी नंतर एलएलबी व एलएलएम असे कायद्याचे शिक्षणही घेतले. ३३ वर्षांच्या कार्यकाळात त्‍यांनी पोलीस उपनिरीक्षक ते आयपीएस अधिकाऱ्यांना जवळपास ८०० लेक्चर दिल्याचे सूत्रांनी सांगितले. त्‍यांनी आजवर डाईंग डिक्लेरेशन, सुप्रीम कोर्ट आॅन रेप केस आणि डायजेस्ट ऑन एमपीडीए ॲक्‍ट १९८१ अशी तीन पुस्तके लिहिली आहेत. शिक्षेचे प्रमाण वाढावे म्हणून त्‍यांनी लिहिलेला शोधप्रबंध पोलीस महासंचालकांनी राज्यभर अंमलात आणला आहे, हे विशेष.

त्‍यांनी सुमारे ४ हजार गुन्हेगारांवर एमपीडीए आणि मोक्कानुसार कारवाई केल्याचे सांगण्यात आले. त्‍यांना आजवर ९ लाख ७० हजार रुपये रोख बक्षीस तर १७० हून अधिक प्रशंसापत्र मिळाले. प्रदूषणाशी संबंधित अनेक कारवायांमुळे ते गाजले. १९९२ ते १९९५ या काळात शहरात दुर्गंधी पसरविणारे हाडे उकळणारे कारखाने त्‍यांनी कारवाई करून बंद पाडले. चिकलठाणा एमआयडीसीतील महाराष्ट्र डिस्टीलरीजवरही त्‍यांनी कारवाई केली. या कारखान्यातून सोडलेल्या रसायनामुळे दुर्गंधी पसरत असल्याने त्‍यांनी कारवाई केली होती.