छळाला कंटाळून विवाहितेची आत्‍महत्‍या, पतीसह सासरच्या ५ जणांविरुद्ध गुन्हा दाखल, वाळूज MIDC तील घटना

छत्रपती संभाजीनगर (सीएससीएन वृत्तसेवा) : शारीरिक व मानसिक छळ करून विवाहितेला आत्‍महत्‍येस प्रवृत्त केल्याप्रकरणी वाळूज एमआयडीसी पोलिसांनी पतीसह सासरच्या ५ जणांविरुद्ध गुन्हा दाखल केला आहे. दसऱ्याच्या दिवशीच सायंकाळी सातला विवाहितेने आत्‍महत्‍या केल्याची घटना वाळूज एमआयडीसी परिसरातील तिसगावमध्ये घडली होती. या प्रकरणात विवाहितेच्या वडिलांनी आता पोलिसांत तक्रार केली आहे.

शीतल समाधान ठाकरे (रा. तिसगाव, वाळूज एमआयडीसी परिसर, मूळ रा. आखाडे, ता. साक्री, जि. धुळे) असे आत्‍महत्‍या केलेल्या विवाहितेचे नाव आहे. तिचे लग्न २२ मे २०२२ रोजी समाधान दौलत ठाकरे याच्यासोबत झाले होते. लग्नानंतर तिला सहा महिने चांगले वागविण्यात आले. नंतर मात्र सासरच्या लोकांनी लग्नात मानपान दिला नाही, कमी हुंडा दिला या कारणावरून तिचा शारीरिक व मानसिक छळ सुरू केला. डिसेंबर २०२२ मध्ये हे दाम्‍पत्‍य तिसगावमध्ये राहायला आले. मात्र पतीचा छळ कमी झाला नाही. दरम्यानच्या कालावधीत तिला मुलगी झाली.

समाधानने घर बांधण्यासाठी ५ लाखांची मागणी केल्यानंतर शीतलचे वडील नंदकुमार नेरकर यांनी दोन लाख रुपये दिले होते. मात्र तरीही सासरचे सतत छळ करत असल्याचे शीतलने वडिलांना सांगितले होते. दसऱ्याच्या दिवशीच सायंकाळी सातला समाधानने तिच्या वडिलांना फोन करून माझे व शीतलचे भांडण झाल्याने तिने फाशी घेतल्याचे सांगितले. ही माहिती मिळताच सासरची मंडळी घाटी रुग्णालयात आली. आता सासरच्या छळामुळे शीतलने आत्महत्या केल्याची तक्रार नंदकुमार नेरकर (रा. वसमार, ता. साक्री, जि. धुळे) यांनी दिली. त्यावरून पती समाधानसह सासरे दौलत ठाकरे, सासू सुनंदा ठाकरे, नणंदा पूजा देसले व किरण पवार या ५ जणांविरुद्ध गुन्हा दाखल करण्यात आला आहे.