छत्रपती संभाजीनगरात ३ भीषण अपघात; हॉटेल व्यावसायिकासह तिघांचा मृत्‍यू, भरधाव ट्रक बनून आले ‘काळ’

छत्रपती संभाजीनगर (सीएससीएन वृत्तसेवा) : ट्रकने दुचाकीला दिलेल्या धडकेत दुचाकीस्वार दोघांचा मृत्‍यू झाला. ही घटना रविवारी (१० नोव्‍हेंबर) सायंकाळी पावणेसहाला पिंप्रीराजा -कचनेर प्रवेशद्वाराकडे जाणाऱ्या रस्त्यावर घडली.

हॉटेल व्यावसायिक कृष्णा प्रकाश दहीहंडे (वय २८, रा. हनुमान चौक चिकलठाणा) व रामेश्वर जनार्दन गोरे (वय ५४, रा. डायगव्हाण, ता. छत्रपती संभाजीनगर) अशी मृत्‍यू झालेल्यांची नावे आहेत. कृष्णा यांचे पिंप्रीराजा- कचनेर रस्त्यावर पाटीलवाडा हॉटेल असून, जेवायला आलेल्या ट्रकचालकाने मोबाइल नेल्याच्या संशयातून कृष्णा यांनी रामेश्वर यांच्या दुचाकीवर बसून त्‍या ट्रकचालकाचा पाठलाग करायला सुरुवात केली.

संभाजीराजे साखर कारखान्याजवळ त्यांच्या दुचाकीला एका ट्रकचालकाने (क्र. सीजी ०७ एव्ही ८८५५) धडक दिली. यात दोघांचा जागीच मृत्यू झाला. नागरिकांनी त्‍यांना छत्रपती संभाजीनगरच्या घाटी रुग्णालयात नेले, मात्र डॉक्‍टरांनी तपासून मृत घोषित केले. कृष्णा यांच्या पश्चात आई, वडील, पत्नी, लहान भाऊ व अवघ्या तीन महिन्यांची मुलगी आहे. कृष्णाच्या कुटुंबाचा दूध व्यवसाय असून ते हॉटेल चालवत होते. घटनेची नोंद करमाड पोलिसांनी घेतली आहे.

ट्रकचा ब्रेक फेल होऊन अपघात, चालकाचा मृत्‍यू
सोलापूर-धुळे महामार्गाने सोलापूरवरून बॉयलर कंपनीचा भुसा घेऊन धुळ्याकडे जाणाऱ्या ट्रकचा ब्रेक फेल होऊन उड्डाणपुलाच्या खांबाला धडकला. यात चालक आनंद कुमार (वय २२, रा. तामिळनाडू) याचा जागीच मृत्यू झाला. रविवारी दुपारी कांचनवाडी उड्डाणपुलाखाली हा अपघात घडला. ट्रकचा ब्रेक अचानक निकामी झाल्याने आनंद यांचा स्टिअरिंगवरचा ताबा सुटल्याचे सांगण्यात आले. ट्रक चक्‍काचूर झाला आहे. ट्रकचा क्‍लिनर मनिम मुर्गन गंभीर जखमी आहे. त्याच्यावर घाटीत उपचार सुरू आहेत. दोन दिवसांपूर्वी ते तामिळनाडू येथून निघाले होते. आनंद कुमारला जेसीबीच्या सहाय्याने बाहेर काढावे लागले. हा ट्रक अन्य कोणत्या वाहनांना धडकला नाही अन्यथा मोठी जीवित हानी झाली असती.

ट्रकच्या धडकेने आयशरचालक गंभीर जखमी
समृद्धी महामार्गाने इस्माईल शमीम खान (वय ३८, रा. मुंबई) हे मुंबईवरून आयशरमधून अमरावतीच्या दिशेने टोमॅटो घेऊन जात असताना रविवारी पहाटे १२:३० वाजता (मध्यरात्री) ट्रकचालकाने (एमएच – १५ – एफ व्ही – ७८८२) त्‍यांना मागून धडक दिली. यात आयशर टेम्पो दूर फेकला जाऊन ईस्माईल यांचा पाय तुटून ते गंभीर जखमी झाले.