खळबळजनक… येवले चहा दुकानमालकावर विजयनगरात तलवारीने जीवघेणा हल्ला!; ३ हल्लेखोर ॲक्‍टिवावरून आले होते…

छत्रपती संभाजीनगर (सीएससीएन वृत्तसेवा) : ॲक्‍टिवावरून आलेल्या तिघांनी येवले चहा दुकान मालकावर तलवारीने जीवघेणा हल्ला चढवला. या हल्ल्यात दुकानमालक युवक जखमी झाला असून, त्‍याच्यावर उपचार सुरू आहेत. ही घटना मंगळवारी (३० जुलै) पहाटे एकच्या सुमारास (मध्यरात्री) विजयनगरात घडली. पुंडलिकनगर पोलिसांनी तिघा अनोळखी हल्लेखोरांविरुद्ध गुन्हा दाखल केला आहे.

योगेश गुलाब घुगे (वय २९, रा. मुकुंदनगर, मुकुंदवाडी रेल्वे स्टेशन) असे गंभीर जखमी दुकानमालकाचे नाव आहे. त्‍याची सुतगिरणी चौकात येवले चहा ही दुकान आहे. तक्रारीनुसार, योगेश चहाचे दुकान बंद करून दुकानातील कामगार अदित्य रमेश वाघ आणि सुमित रमेश वाघ यांच्यासोबत मोटरसायकलीने जात असताना कालिका माता मंदिर विजयनगर येथे त्यांची मोटरसायकल बंद पडली. त्याचवेळी त्यांच्याजवळ एक पांढरी मोपेड ॲक्टिवा येऊन थांबली. ॲक्टिवावर तिघे युवक होते. त्‍यापैकी एकाने काहीएक कारण नसताना हातातील लोखंडी तलवारीने तिघांवर हल्ला चढवला.

तलवारीचा वार आदित्य व सुमित यांनी हुकवला. तो वार योगेशच्या मानेच्या डाव्या बाजूला लागला. त्याच वेळी हल्लेखोराने हातातील तलवारीने जीवे मारण्याच्या उद्देशाने योगेश्चया पोटाच्या उजव्या बाजूला वार केला. ॲक्टिवा चालवणाऱ्याने उतरून त्याच्याकडील तलवारीने योगेशच्या कमरेच्या उजव्या बाजूला वार केला. घटनास्थळावरून आदित्य वाघ व सुमित वाघ जीव वाचविण्यासाठी तेथून पळून गेले होते. योगेशने जिवाच्या आकांताने तिथून पळ काढत मित्र सचिन बडवे याला कॉल करून माहिती दिली. त्‍यानेच योगेशला घाटी रुग्णालयात दाखल केले. सध्या योगेशवर उपचार सुरू आहेत. अधिक तपास पोलीस उपनिरीक्षक संदीप काळे करत आहेत.