ऑनर किलिंगची धमकी; प्रेमविवाह केलेल्या मुलीच्या कुटुंबीयांनी मुलाच्या कुटुंबाला घरात घुसून सिनेस्टाइल बेदम झोडपले!

छत्रपती संभाजीनगर (सीएससीएन वृत्तसेवा) : इंदिरानगरातील ऑनर किलिंगची ताजी असतानाच तशीच धमकी मुलीच्या कुटुंबीयांनी मुलाच्या कुटुंबाला घरात घुसून दिली. मुलाच्या कुटुंबाला बेदम मारहाण करत जीवे मारण्याची धमकी दिल्याने त्‍यांनी तातडीने मुकुंदवाडी पोलिसांत धाव घेतली. त्‍यानंतर पोलिसांनी तातडीने कारवाई करत गुन्हा करून संशयितांना ताब्‍यात घेत पोलीस उपायुक्‍त नवनीत काँवत यांच्यासमोर हजर केले. ही घटना सोमवारी (५ ऑगस्ट) सायंकाळी साडेसहाच्या सुमारास मुकुंदवाडीतील संजयनगर भागात घडली.

प्रकाश गोपीनाथ राठोड, नवनाथ गोपीनाथ राठोड, करण शिवाजी राठोड, राहुल शिवाजी राठोड, मनोज अर्जुन राठोड, ऋतिक राठोड आणि तीन महिलांचा संशयितांत समावेश आहे. दिगंबर कान्हुजी लांडगे (५२, रा. संजयनगर, मुकुंदवाडी, गल्ली क्र. ४) यांनी या प्रकरणात तक्रार दिली आहे. ते रिक्षाचालक आहेत. त्यांचा मुलगा शुभमने बारा दिवसांपूर्वी लहानपणीची मैत्रिण रोशनी राठोड हिच्यासोबत लग्नगाठ बांधली. धर्म भिन्न असल्याने रोशनीच्या कुटुंबाचा लग्नास विरोध होता. घरातून मुलगी पळून गेल्यानंतर बराच शोध घेतल्यानंतर ती शुभमसोबत पळून गेल्याचे लक्षात येताच राठोड कुटुंबीय ५ ऑगस्टला लांडगे यांच्या घरात घुसले.

तिथे प्रेमविवाह केलेले जोडपे नव्हते. त्‍यामुळे राग दिगंबर लांडगे आणि त्‍यांच्या कुटुंबावर काढला. मारहाण करत प्रकाश राठोडने माझी पुतणी उद्या माझ्या घरी आणून सोडली नाहीस तर तुला जिवे मारीन, अशी धमकी दिली. लांडगे यांच्या मुलाला उचलून नेण्याची धमकी दिली. महिलांनीही लांडगे यांची पत्नी कल्पनाला माझी नात आणून दे नाही तर तुझ्या जीवाचे बरे वाईट करेल, अशी धमकी दिली. पोलीस निरीक्षक शिवाजी तावे यांनी प्रकाशसह नवनाथ गोपीनाथ राठोड, करण शिवाजी राठोड, राहुल शिवाजी राठोड, मनोज अर्जुन राठोड, ऋतिक राठोड यांच्यावर गुन्हा दाखल केला. त्यांना उपायुक्त नवनीत काँवत समोर हजर केले.

किर्तीशाही कुटुंब पसार…
इंदिरानगरातील अमितच्या हत्येप्रकरणी सासरा गीताराम कीर्तिशाही व चुलत साला आप्पासाहेब कीर्तिशाहीला पोलिसांनी अटक केल्यानंतर त्यांना मदत केली म्हणून पोलीस आपल्यालाही अटक करतील या भीतीने किर्तीशाही कुटुंब मात्र पसार झाले आहे. त्यांचा शोध सुरू असून, आरोपींची संख्या वाढेल, असे जवाहरनगर पोलिस ठाण्याचे पोलीस निरीक्षक सूरज बंडगर यांनी सांगितले.