आजीबाईला १७ हजारांचा मोह झाला, लाखाचे दागिने गमावून बसली; आज दुपारची सातारा परिसरातील घटना, नक्की काय झालं वाचा…

छत्रपती संभाजीनगर (सीएससीएन वृत्तसेवा) : आजीबाईला १७ हजारांच्या मोहापायी तब्‍बल १ लाख रुपयांचे दागिने गमवावे लागले. भामट्याने त्‍यांना तुमच्या नावावर १७ हजार रुपये आले आहेत, असे म्‍हणून मोटारसायकलीवर बसवून रेणुका माता कमानीजवळ नेले. तिथे त्‍यांचे दागिने वजन करायचे आहेत, असे म्‍हणून काढून घेतले आणि पळून गेला… ही घटना आज, २० ऑगस्टला दुपारी दोनच्या सुमारास सातारा परिसरात घडली.

साखराबाई भिका बावसकर (वय ६५ रा. पृथ्वीनगर, सातारा परिसर) यांनी सातारा पोलीस ठाण्यात तक्रार दिली आहे. त्‍या मुलगा व नातवासह राहण्यास आहेत. दुपारी दोनला नातीला त्‍यांनी फुलंब्रीला जाण्यासाठी रेणुकमाता कमान रोड हिंदुस्थान किराणा दुकानासमोरून रिक्षात बसवून दिले. नंतर घराकडे परतत असताना एक भामटा त्‍यांच्याकडे आला. तो म्हणाला की, आई माझे नाव दत्तू वाघ आहे. तुमच्या नावावर सतरा हजार रुपये आलेले आहेत. तुम्ही माझ्यासोबत चला, असे तो म्हणाल्याने आजीबाईला १७ हजारांचा मोह झाल्याने त्‍या मोटारसायकलीवर बसल्या. तो भामटा त्‍यांना रेणुकामाता कमानीजवळील गौरी मेडीकलजवळ घेऊन आला.

तिथे असलेली तिनही दुकाने त्याचे असल्याचे त्याने सांगितले. म्हणाला की, आई तुमचे गळ्यातील सोन्याचे पोतीचे वजन करायचे आहे. सोन्याचे पोती माझ्याकडे द्या. त्यामुळे आजाबाईंनी त्या माणसाकडे गळ्यातील पोती काढून दिल्या. दोन्ही पोती प्रत्‍येकी ५० हजार रुपयांच्या होत्‍या. सोन्याच्या पोती मिळताच तो पळून गेला. त्‍याचे वर्णन असे आहे : उंची ६ फूट, अंगात निळी जिन्स, पांढऱ्या चौकड्याचा शर्ट, डोक्याला टाळूच्यावर केस नसलेला, काळी मोटारसायकल त्याच्याकडे होती. वाचकहो, तुम्हालाही अशा वर्णनाचा भामटा कुठे दिसल्यास लगेचच सातारा पोलिसांना कळवा. पोलिसांनी त्‍या भामट्याविरुद्ध गुन्हा दाखल केला असून, त्‍याचा शोध घेतला जात आहे. अधिक तपास पोलीस अंमलदार पृथ्वीराज चव्हाण करत आहेत.