अट्टल गुन्हेगार ‘खंग्या’ आता हर्सूल जेलमध्ये ‘खंगणार’!

छत्रपती संभाजीनगर (सीएससीएन वृत्तसेवा) : लूटमार, प्राणघातक हल्ल्याचे ८ गंभीर गुन्हे दाखल असलेला कुख्यात गुन्हेगार विनोद ऊर्फ खंग्या विजय चव्हाण (वय २२, रा. साजापूर शिवार) याला ‘एमपीडीए’अंतर्गत हर्सूल कारागृहात स्थानबद्ध करण्यात आले आहे.

पुंडलिकनगर, जवाहरनगर, सिडको एमआयडीसी व सिडको ठाण्याच्या हद्दीत खंग्या कुप्रसिद्ध आहे. तो खंग्या श्रीरामपूरचा असून छत्रपती संभाजीनगरात त्‍यांने दहशत माजवली होती. श्रीरामपूरमध्येदेखील त्याच्याविरुद्ध गुन्हे दाखल आहेत. शिर्डी पोलिसांनीही यापूर्वी त्याच्यावर प्रतिबंधात्मक कारवाई केली होती. छत्रपती संभाजीनगरात त्‍यांचे गुन्हे वाढू लागल्याने पोलिसांच्या तो टार्गेटवर आला.

पोलीस त्‍याच्या मागावर होते. मात्र तो सहा महिन्यांपासून पसार होता. अहमदनगर पोलिसांनी त्याला अटक केल्याचे कळताच शहर गुन्हे शाखेने न्यायालयाच्या परवानगीनंतर त्याला ताब्यात घेतले व हर्सूल कारागृहात डांबले आहे. पोलीस निरीक्षक संदीप गुरमे, पोलीस उपनिरीक्षक प्रमोद देवकाते, सहायक फौजदार द्वारकादास भांगे, अंमलदार प्रदीप दंडवते, मंगेश पवार, सहदेव साबळे, महादेव दाणे, दीपाली सोनवणे यांनी ही कारवाई केली.

काय आहे एमपीडीए कायदा?
महाराष्ट्र झोपडपट्टीदादा, हातभट्टीवाले, औषधी द्रव्यविषयक गुन्हेगार व धोकादायक व्यक्तींच्या विघातक कृत्यास आळा घालण्याबाबत अधिनियम १९८१ म्हणजेच एमपीडीए (महाराष्ट्र प्रोहिबिशन ऑफ डेंजरस अ‍ॅक्टिविटी) होय. सराईत गुन्हेगार किंवा सार्वजनिक कायदा व सुव्यवस्था भंग करणाऱ्या कोणत्याही व्यक्तीविरुद्ध एमपीडीएची कारवाई करता येते. या कायद्यानुसार सराईत गुन्हेगाराला एक वर्षासाठी कारागृहात स्थानबद्ध करण्यात येते. परंतु कारवाईनंतर त्याला पोलीस आयुक्त, उच्च न्यायालय किंवा अतिरिक्त मुख्य सचिव (गृह) यांच्याकडे अपील करता येते.