अजब बलात्काराची गजब कहानी… लग्नाच्या आमिषाने १९ वर्षे करत राहिला जबरदस्ती शरीरसंबंध!, ५५ वर्षांच्या वृद्धाविरुद्ध बलात्‍काराचा गुन्हा दाखल

छत्रपती संभाजीनगर (सीएससीएन वृत्तसेवा) : एक, दोन नव्हे, पाच नव्हे तर तब्बल १९ वर्षे आपल्यावर लग्नाच्या आमिषाने वारंवार बलात्‍कार झाल्याची अजब तक्रार एका महिलेने जवाहरनगर पोलिसांत केली आहे. त्यावरून पोलिसांनी ५५ वर्षीय वृद्धाविरुद्ध बलात्काराचा गुन्हा दाखल केला आहे.

सदाशिव तुकाराम साळुंखे (५५, रा. सांगली) असे संशयिताचे नाव आहे. पीडित महिलेच्या तक्रारीनुसार, सदाशिव आणि तिची ओळख होती. सदाशिवने तिला लग्नाचे आमिष दाखवले. वेगवेगळ्या ठिकाणी नेऊन तिच्यासोबत शारीरिक संबंध ठेवले. गेल्या १९ वर्षांत वेगवेगळ्या कारणांनी तिच्याकडून फोन पे आणि रोख स्वरुपात तिच्याकडून २० लाख रुपयेसुद्धा उकळल्याचे महिलेने तक्रारीत म्हटले आहे. त्यानंतर तो गायब झाला. दोन दिवसांपूर्वी महिलेने जवाहरनगर पोलीस ठाणे गाठून तक्रार दिली. त्यावरून पोलिसांनी गुन्हा दाखल केला आहे.

मोबाइल नंबर मागून महिलेसोबत अश्लील कृत्य
महिला घरासमोर कपडे वाळवत असताना राजू पटेल (वय २८, रा. अजिज कॉलनी, नारेगाव) आला. त्याने तुझा मोबाइल नंबर दे, माझ्याशी बोल, असे म्हणत तिच्यासोबत अश्लील चाळे केले. तिने ही बाब तिच्या पतीला सांगितली. तिचा पती राजूला याबाबत विचारणा करायला गेला असता त्यालाही मारहाण करून राजूने धमकावले. हा प्रकार बुधवारी (१८ सप्टेंबर) सकाळी साडेनऊच्या सुमारास अजिज कॉलनीत घडला. महिलेने दिलेल्या तक्रारीनुसार सिडको एमआयडीसी पोलिसांनी राजूविरुद्ध गुन्हा दाखल करण्यात आला आहे. अधिक तपास केला जात आहे.