श्रीयश इंजिनिअरिंग कॉलेजकडून विद्यार्थिनींची लूट?; तंत्र शिक्षण सहसंचालक कार्यालयाने घेतली झाडाझडती!

छत्रपती संभाजीनगर (सीएससीएन वृत्तसेवा) : राज्‍यात उच्च शिक्षण घेणाऱ्या मुलींना मोफत शिक्षण आहे. व्यावसायिक अभ्यासक्रमांसाठी शिक्षण शुल्कात मुलींना १०० टक्के सवलत असूनही श्रीयश इंजिनिअरिंग कॉलेजसह साई कॉलेजकडून विद्यार्थिनींची आर्थिक लूट होत असल्याच्या तक्रारी प्राप्त झाल्याने तंत्र शिक्षण सहसंचालक कार्यालयाने या दोन्ही कॉलेजची झाडाझडती घेतली.

इतर मागास प्रवर्ग(ओबीसी), आर्थिकदृष्ट्या दुर्बल घटक(ईडब्ल्यूएस), सामाजिक व शैक्षणिकदृष्ट्या मागास प्रवर्गातील(एसईबीसी) वार्षिक कौटुंबिक उत्पन्न आठ लाख रुपयांपेक्षा कमी असलेल्या पात्र विद्यार्थिनींसाठी उच्च व तंत्रशिक्षण खात्याकडून मोफत शिक्षण योजना लागू करण्यात आली आहे. ही योजना केवळ व्यावसायिक अभ्यासक्रमांसाठीच लागू आहे. इंजिनिअरिंग, पॉलिटेक्निक, फार्मसीसह विविध अभ्यासक्रमांच्या प्रवेश प्रक्रियेत काही महाविद्यालयांकडून विद्यार्थिनींची आर्थिक लूट सुरू असल्याच्या तक्रारी उच्च व तंत्रशिक्षण खात्याकडे येत आहेत.

छत्रपती संभाजीनगर शहरातील श्रीयश इंजिनिअरिंग कॉलेज व साई कॉलेजबद्दल तक्रारी झाल्या आहेत. त्‍यामुळे अधिकाऱ्यांनी श्रीयश कॉलेज आणि साई कॉलेजची झाडाझडती घेत कागदपत्रांची तपासणी केली. आणखी काही कागदपत्रांची मागणी करण्यात आली आहे. याबाबतचा अहवाल तंत्र शिक्षण संचालकांकडे पाठविण्यात येणार असल्याचे अधिकाऱ्यांनी सांगितले. बीड जिल्ह्यातील एका महाविद्यालयाबाबतही तक्रार होती. तिथेही तपासणी करण्यात आली आल्याचे अधिकाऱ्यांनी सांगितले.